सौर्य खबर

२०८२ जेष्ठ २९, बिहीबार ०९:५१

संवैधानिक आयोगका ५२ पदाधिकारीविरुद्धको रिटमाथि सर्वोच्च अदालतमा दायर मुद्दाको फैसला आउँदो असार १८ गते आउने भएको छ ।

प्रधानन्यायाधीश प्रकाशमानसिंह राउतसहित न्यायाधीशहरू सपना प्रधान मल्ल, मनोजकुमार शर्मा, कुमार चुडाल र नहकुल सुवेदीको संवैधानिक इजलासमा रहेको मुद्दामा हिजो फैसला आउने भनिए पनि निर्णय सुनाउने मिति सरेको हो ।

यसअघि गएको जेठ १ गते सुनुवाइ सकिएपछि हिजोको लागि निर्णय सुनाउने मिति तोकिएको थियो । तर न्यायाधीशहरुबीच हिजो दिनभर छलफल भए पनि फैसलाबारे निर्णय हुन सकेन ।

केपी शर्मा ओली नेतृत्वको तत्कालीन सरकारले २०७७ र २०७८ सालमा दुई चरणमा गरी अध्यादेशमार्फत संवैधानिक निकायमा ५२ पदाधिकारी नियुक्त गरेकोमा ती नियुक्तिहरू ‘गैरकानूनी’ रहेको दाबी गर्दै चार वर्षअघि सर्वोच्च अदालतमा रिट निवेदन दर्ता भएको थियो ।

गएको माघ ३० गतेसम्म रिटमा सुनुवाइ नै थालेको थिएन । त्यसअघि १० पटकसम्म ‘हेर्न नभ्याइने’मा परेर पेसी सरेको थियो । गएको माघ ३० गते निरन्तर सुनुवाइ गर्न ‘हेर्दाहेर्दै’ मा राखेर अघि बढाइएको थियो ।

गएको वैशाख २८ र ३० तथा १ जेठको सुनुवाइबाट बहस सकिएपछि संवैधानिक इजलासले हिजोको लागि निर्णय सुनाउने मिति तय गरेको थियो । तर हिजो पनि निर्णय हुन नसकेर असार १८ गतेलाई सरेको हो ।