२०७८ मंसिर २८, मंगलवार १८:४१

काठमाडौं । नेकपा एमालेको अबरोधका कारण प्रतिनिधिसभाको बैठक एक हप्ताका लागि स्थगित भएकोछ । आज संसद अधिवेशनको पहिलो बैठक बसेपछि अर्को बैठक पुस ६ गते मंगलबार दिउँसो १ बजेसम्मका लागि स्थगित गरिएको सभामुख अग्नि सापकोटाले जानकारी दिनुभयो । आजको बैठकमा सरकारका तर्फबाट कानुन न्याय तथा संसदीय मामिलामन्त्री दिलेन्द्रप्रसाद बडुले नेपाल प्रहरी र प्रदेश प्रहरी कार्यसञ्चालन, सुपरिवेक्षण र समन्वय पहिलो संशोधन अध्यादेश २०७८ पेस गर्नुभएको छ ।

यस्तै तेजाब तथा अन्य घातक रासायनिक पदार्थ नियमन अध्यादेश २०७८ र सामाजिक सुरक्षा पहिलो संशोधन अध्यादेश २०७८ पेस भएको छ । यसैगरि रेल्वे अध्यादेश २०७८, यौन हिंसाविरुद्धका केही ऐनलाई संशोधन गर्ने अध्यादेश २०७८ र फौजदारी कसूर तथा फौजदारी कार्यविधि सम्बन्धी केही ऐन संशोधन गर्ने अध्यादेश पनि संसदमा पेश भएको छ ।

संसद अधिवेशन चालु नरहेको अवस्थामा सरकारले ल्याएको अध्यादेश संसदको पहिलो बैठकमा नै पेस गर्नुपर्ने प्रावधान अनुसार अध्यादेश पेश भएको हो । तर अध्यादेशहरु पेश गर्ने क्रममा पनि नेकपा एमालेले अबरोध कायमै राखेको थियो । एमालेले कारबाही गरेका सांसदको कारबाहीलाई सभामुखले मान्यता नदिएको विरोधमा एमालेले अघिल्ले अधिवेशनबाट नै संसद अबरोध गर्दै आएको छ । एमालेले निरन्तर संसद अबरोध गर्दै जाने बताइसकेको छ । आफूहरुको नाराबाजीका बीचमा सभामुख सापकोटाले संसद चलाएको भन्दै एमालेका सांसदहरुले आपति जनाएका छन् ।