२०७८ मंसिर २५, शनिबार ०९:४८

काठमाडौं । यो वर्षको हिउँद सुरु भएयता काठमाण्डौंको तापक्रम आज बिहान कम मापन गरिएको छ । मौसम पूर्वानुमान महाशाखाका अनुसार आज बिहान काठमाडौंको तापक्रम ५ दशमलव ६ डिग्री सेल्सियसमा झरेको छ । यसअघि हिजो काठमाडौंको न्यूनतम तापक्रम ६ दशमलव ५ डिग्री सेल्सियस मापन गरिएको थियो ।

राति आकाश खुलेकाले बिहानको तापक्रम घटेको महाशाखाका मौसमविद् गंगा नगरकोटीले  बताउनुभयो । उहाँका अनुसार आज दिउँसो भने देशभरी कै मौसम सफा हुने सम्भावना छ । उच्च पहाडी तथा हिमाली भेगका एक दुई ठाउँमा भने हल्का हिमपात हुने देखिएको उहाँले बताउनुभयो ।

आज र भोलि देशभरी कै मौसम सफा भएपनि पर्सिले सुदूरपश्चिम, कर्णाली र गण्डकी प्रदेशको हिमाली भेगमा भारी हिमपातको सम्भावना रहेको उहाँले जानकारी दिनुभयो । पर्सि पश्चिमी वायु नेपाल आउँने भएकाले यी प्रदेशको हिमाली भेगमा हिमपात हुने तर अरु प्रदेशको मौसम भने सामान्यतया सफा नै रहेने मौसमविद् नगरकोटीको भनाइ छ ।