२०७८ मंसिर २२, बुधबार १०:४८

काठमाडौं । शुक्रबारबाट सुरु हुने १४ महाधिवेशनको तयारी अन्तिम चरणमा पुगेको नेपाली काँग्रेसले जनाएको छ । पार्टीका प्रवक्ता विश्वप्रकाश शर्माले महाधिवेशनको लागि आवास, खाद्यान्नको व्यवस्थापन र प्रचारप्रसारका काम अन्तिम चरणमा पुगेको उहाँले बताउनुभयो ।

कोरोना भाइरसको जोखिम कायमै रहेको बेला नयाँ भेरियन्टले बढाउन सक्ने समस्यालाई मध्यनजर गरी महाधिवेशन स्थलमा स्यानिटाइजर, मास्क अनिवार्य गरिएको छ भने अन्य प्रकारका रोगका लागि पनि महाधिवेशनस्थलमै हेल्थडेस्क स्थापना गरिने पनि प्रवक्ता शर्माले जानकारी दिनुभयो ।

महाधिवेशनकै लागि निर्वाचन समितिले पनि पहिलो चरणको काम सकिएको जनाएको छ । समितिका संयोजक गोपालकृष्ण घिमिरेले एक सय ६० वटा निर्वाचन क्षेत्रको अधिवेशन सम्पन्न भइसकेको जानकारी दिनुभयो । उहाँले महाधिवेशनअघि प्रदेश २ को प्रदेश अधिवेशन नहुने बताउनुभयो ।

प्रदेश २ को प्रदेश अधिवेशन महाधिवेशनपछि मात्रै गर्ने गरि कार्यतालिका सार्वजनिक गरिने उहाँको भनाइ छ । तर जिल्ला अधिवेशनका लागि भने कार्यतालिका सार्वजनिक भइसकेको छ । निर्वाचन समितिका संयोजक गोपालकृष्ण घिमिरेले आजसम्ममा सर्लाही र महोत्तरीको महाधिवेशन प्रतिनिधिको नामावली आइसक्ने बताउनुभयो ।