सौर्य खबर

२०८२ श्रावण १७, शनिबार १२:१७

काठमाडौं ।
सरकारले मधेशलाई सुख्खा संकटग्रस्त क्षेत्र घोषणा गरेपनि दिर्घकालीन योजना नल्याएको भन्दै युवाहरुले काठमाडौंमा प्रदर्शन गरेका छन् ।
सुख्खाग्रस्त क्षेत्र घोषणा गरेर संघ सरकार र प्रदेश सरकार डिप बोरिङ गाड्ने जस्ता अल्पकालीन योजनामा लागेको भन्दै युवाहरुले आक्रोश पोखेका छन् ।
‘डिप बोरिङ समस्याको समाधान होइन, दिगो समाधानको व्यवस्था गर’ जस्ता नारा लगाउँदै मधेशका युवाहरु शुक्रबार काठमाडौंको माइतीघरमा भेला भएर सरकारको ध्यानाकर्षण गराएका छन् ।
चुरे संरक्षणमा जोड दिनुपर्ने भन्दै उनीहरुले सुक्खा प्रभावित किसानहरुलाई तत्काल राहत प्याकेजको व्यवस्था गर्न माग गरेका छन् । यस्तै किसानलाई २४ घण्टा निःशुल्क बिजुली उपलब्ध गराउनुपर्ने, तराई–मधेशका किसानलाई नगद क्षतिपूर्ति दिनुपर्ने लगायतका नारा लेखिएका प्ले कार्ड बोकेर युवाहरु प्रदर्शनमा उत्रिएका थिए । मधेश कृषि–जल आन्दोलन संघर्ष समितिको ब्यानरमा युवाहरू भेला भएका थिए ।