सौर्य खबर

२०८२ असार ३०, सोमबार १७:१७

नेकपा माओवादी केन्द्रका अध्यक्ष पुष्पकमल दाहाल प्रचण्डले दुई ठूला दलहरूको मिलोमतोले संसदलाई ‘विचौलियाको खेलमैदान’ बनाइएको आरोप लगाउनुभएको छ ।

सोमबार प्रतिनिधिसभा बैठकमा सम्बोधन गर्दै प्रचण्डले ठूला दुई दल मिलेर संख्याको बलमा संसदलाई ‘विचौलियाको खेलमैदान’ बनाइएको आरोप लगाउनुभएको हो । यस्तो प्रवृत्ति देश र जनताका लागि लज्जास्पद र खेदजनक भएको उहाले बताउनुभयो । प्रचण्डले वर्तमान सरकार कामले कांग्रेस एमाले कै नेता कार्यकर्ता खुसी बन्न नसकेको भन्दै आलोचना समेत गर्नुभयो ।

उहाँले अप्राकृतिक गठबन्धनको औचित्यमाथि प्रश्न उठाउँदै सरकारसँग जनताको भरोसा र नैतिक धरातल अझै बाँकी छ कि छैन भन्ने गम्भीर प्रश्न गर्नुभयो । सरकारका गतिविधिबाट आम जनता मात्र होइन, सत्तारूढ दलकै कार्यकर्ता समेत असन्तुष्ट भएको उहाले बताउनुभयो ।

प्रचण्डले वर्तमान सरकार दलाल र बिचौलियाको स्वार्थमा चलेको उल्लेख गर्दै अप्राकृतिक गठबन्धनको चरित्र लोकले नै लाज मान्ने गरी उजागर भएको आरोप लगाउनुभयो । अर्बौंको चलखेल उल्ट्याउन र सेटिङ भत्काउन खोज्दा बनेको अप्राकृतिक गठबन्धन स्वयंले आफ्नो चरित्र प्रकट गरिसकेको उहाले बताउनुभयो । उहाँले सरुवा–नियुक्तिमा हुने लाखौंका डिलहरुजस्ता घटनाहरूको उदाहरण दिँदै, सरकार नियामक संस्थामाथि समेत बिचौलियाको इशारामा काम गरिरहेको गम्भीर आरोप लगाउनुभयो ।

त्यस्तै प्रचण्डले कांग्रेसले समेत जनताले दिएको मतलाई जनताको पक्षमा काम गर्ने गरी सदुपयोग गर्न नसकेको आलोचना गर्नुभयो । उहाँले हालै देखिएका प्रतिगामी हर्कतहरू सरकारकै कमजोरी र असन्तुलनको परिणाम भएको उल्लेख गर्नुभयो । प्रचण्डले गणतन्त्रमाथि कतैबाट खतरा छ भने राजवादी वा कसैबाट भन्दा पनि बढि सरकारबाटै खतरा रहेको टिप्पणी गर्नुभयो ।

अग्रगामी संविधान संशोधन गर्न दुईतिहाई बहुमत जुटाउनुपर्ने आवश्यकता औंल्याउँदै उहाँले सरकारसँग हिम्मत छ भने प्रमुख प्रतिपक्षका नाताले त्यो बहुमत जुटाउने जिम्मेवारी लिने स्पष्ट पार्नुभयो । संसद र संसदीय समितिमा भैरहेका भूमिकाप्रति समेत असन्तुष्टि जनाउँदै प्रचण्डले विधेयकहरू सर्वसम्मत पारित भए पनि प्रतिनिधिसभामा पुग्दा भएका चलखेल र हस्तक्षेपका कारण अगाडि बढ्न नसकेको भन्दै चर्को आलोचना गर्नुभयो ।