सौर्य खबर

२०८२ श्रावण १९, सोमबार ०८:५४

लामो समयको प्रतिक्षापछि पानी पर्न थालेपछि मधेशका किसान हर्षित हुँदै धान रोपाइँमा जुटेका छन् । आकाशे पानीको भरमै धान रोपाइँ गर्ने गरेका किसानलाई अहिलेसम्म पनि परम्परागत पानीकै भरमा पर्नुपर्दा लामो समयसम्मको खडेरीले सुख्खा भएको खेतमा धाँजा फाट्न थालेको थियो । जसले गर्दा किसानहरु निराश भएका थिए । तर लामो समयको अन्तरालपछि आकाशे पानी पर्दा किसान धान रोपाइँमा जुटेका छन् ।

पछिल्लो शुक्रबारदेखि दिनहुँ मधेश प्रदेशका सबैजसो स्थानमा पानी पर्न थालेको छ । धनुषाको क्षीरेश्वरनाथ नगरपालिका–३ स्थित दिगम्बरपुरका किसान रामउद्गार महतोले लामो खडेरीपछि आएको वर्षाले खेतीमा ज्यान फर्काएको बताए । उनले जेठ र असार महिनामा थोरै पानी पर्दा धान रोपाइँमा गम्भीर असर परेको बताए । उनले भने, ‘कसैले डिप बोरिङको सहायताले रोपाइँ गरेको भएपनि चर्को घामका कारण बिरुवा सुक्न थालेका थिए। तर हालको वर्षाले बालीलाई नयाँ जीवन दिएको छ ।’ स्थानीय किसान दिलीप महतोले पछिल्लो वर्षा किसान र धानबालीका लागि अमृत समान बनेको बताए । सिँचाइ अभावमा रोपिएको बाली सुक्ने अवस्था पुगेको थियो भने त्यससँगै किसानको मिहिनेत खेर जाने अवस्था आइपुगेको थियो। अहिलेको वर्षाले सबथोक बचाएको किसान महतोको भनाइ छ ।

वर्षा नहुँदा मधेश प्रदेशमा धान रोपाइँ प्रभावित हुने अवस्था देखेपछि प्रदेश सरकारले मधेशलाई सुख्खा ग्रस्त क्षेत्र घोषणा गरेको थियो भने संघीय सरकारले तीन महिनाका लागि संकटग्रस्त क्षेत्रको रूपमा सूचीकृत गरेको छ । भूमि व्यवस्था, कृषि तथा सहकारी मन्त्रालयका सचिव डा. उमेश दाहालका अनुसार पछिल्ला दिनमा मधेशका सबै जिल्लामा वर्षा भएको छ । उनले प्रदेशका सबैजसो स्थानमा वर्षा भएकाले रोपाइँको गति बढेको बताए ।

कृषि विकास निर्देशनालयका तथ्यांक अनुसार मधेश प्रदेशमा कुल तीन लाख ७२ हजार ६४५ हेक्टर क्षेत्रफलमा धान रोपाइँ हुने जमिन छ । साउन १६ गतेसम्म दुई लाख १३ हजार ४३८ हेक्टर क्षेत्रफलमा धान रोपाइँ सम्पन्न भएको छ। जुन कुल क्षेत्रफलको ५७ प्रतिशत छ । सचिव दाहालले रोपाइँ क्षेत्रमा वृद्धि हुने बताए । उनले पानी पर्ने क्रम कायम रहेकाले साउन महिना भित्रै बाँकी खेतमा पनि रोपाइँ सकिने छ। ढिलो भए पनि यो वर्षाले मधेशका किसान उत्साहित देखिएको बताए ।