सौर्य खबर

२०८२ श्रावण ६, मंगलवार १७:४५

राजविराज । मधेश प्रदेशका मुख्यमन्त्री सतिशकुमार सिंहको निर्देशनपछि सप्तरीको विभिन्न पालिकामा ट्याङ्कर तथा दमकलमार्फत खानेपानी वितरण सुरु गरिएको छ।

प्रदेश सरकारले व्यवस्थापन गरेको ट्याङ्कर तथा दमकल मार्फत रुपनी गाउँपालिका १ र २ मा मङ्गलबार खानेपानी वितरण गरिएको हो ।

राजगढ गाउँपालिका, अग्निसाइर कृष्णासवरन गाउँपालिका, विष्णुपुर गाउँपालिका र सुरुङ्गा नगरपालिकाका खानेपानी सङ्कटग्रस्त बस्तीहरुमा शुद्ध पानीको आपूर्ति सुरु गरिएको प्रमुख जिल्ला अधिकारी भोला दाहालले जानकारी दिनुभयो । उहाँले जिल्लामा पानीको अभाव रहेका टोल बस्तीहरुमा सोमबारदेखि खानेपानी संस्थानाट शुद्ध पानी उपलब्ध गराई वितरण शुरु गरिएको बताउनुभयो ।

“जिल्लाको सबै ठाउँमा त्यस्तो समस्या छैन् । तर जहाँ खानेपानीको अभाव छ, त्यहाँ वडाअध्यक्ष र पालिका प्रमुखसँग समन्वय गरी शुद्ध खानेपानी वितरण शुरु गरिएको छ,” प्रमुख जिल्ला अधिकारी दाहालले भन्नुभयो ।

बरखगण राजविराजको नेपाली सेनाको सहयोगमा सञ्चालन गरिएको यस अभियानमा स्थानीय पालिकाहरूको मागका आधारमा पानी आपूर्ति गरिएको जिल्ला प्रशासन कार्यालय सप्तरीले जनाएको छ।