२०८२ असार २१, शनिबार १२:०९
जनकपुरधाम ।
धनुषाको जनकपुरधाममा रहेको मणिमण्डप स्थित नयाँ राम जानकी विवाह मण्डपको निर्माण कार्य अन्तर्गत पहिलो चरणको कार्य अन्तिम चरणमा पुगेको छ । नव निर्मित विवाह मण्डपले धार्मिक पर्यटनको संभावना बलियो बनाउने अपेक्षा गरिएको छ ।
जनकपुरधाम उपमहानगरपालिका–१३ मा रहेको मणिमण्डपमा नयाँ विवाह मण्डपको निर्माण कार्य सम्पन्न गरेर संघीय शहरी भवन निर्माण कार्यालय धनुषाले हस्तान्तरण गर्ने तयारी गरेको छ । ४ विघा क्षेत्रफलमा फैलिएको विवाहमण्डपमा नयाँ आकर्षक भवनहरुको निर्माण भईरहेको देखेर स्थानीय हर्षित छन् ।
शहरी विकास मन्त्रालयको ‘सघन सहरी कार्यक्रम’ अन्तर्गत २०७५ मंसिर २४ गते रविना कन्स्ट्रक्सनले १८ करोड ९१ लाख ५१ हजार ४ सय ६० रुपैयाँमा ठेक्का लिएको उक्त भवन निर्माण कार्य अन्तिम चरणमा पुर्याएको संघीय शहरी भवन निर्माण कार्यालय धनुषाका प्रमुख विनोद यादवले जानकारी दिए । कार्यालयका अनुसार मणिमण्डपको निर्माण कार्य ९५ प्रतिशत सम्पन्न भईसकेको छ । साउन पहिलो साता उपप्रधानमन्त्री तथा भौतिक पूर्वाधार विकास मन्त्री प्रकाशमान सिंहको उपस्थितिमा स्थानीय तहलाई हस्तान्तरण गर्ने तयारी गरिएको हो ।
मण्डपकै छेउमा मिथिला क्षेत्रको झल्को दिनेगरी राजा जनकको दुई तले दरबारको निर्माण पनि गरिएको छ । शुरुमा विवाहमण्डपको जग्गाको विषयलाई लिएर विवाद हुँदा भवन निर्माणको कार्य सम्झौता भएको एक वर्षपछि मात्रै शुरु भएको थियो । जनकपुरधाममा प्रत्येक वर्ष हुने विवाहपञ्चमी तथा सामूहिक विवाह कार्यक्रमकालागि बेहुला पक्ष, बेहुली पक्ष तथा जन्तीकालागि बेग्लाबेग्लै भवनहरु निर्माण गरिएको छ ।
जनकपुरधाममा रहेको प्राचिन रामजानकी विवाहको वेदीको छेउमै भवनहरु निर्माण गरिँदा पर्यटकीय दृष्टिकोणले आझेलमा पर्दै गईरहेको यो स्थलको प्रचार प्रसार हुनुका साथै पर्यटकीय चहलपहल बढ्ने स्थानीयको विश्वास छ ।
मणिमण्डपको पहिलो चरणको निर्माण कार्यक्रम अन्तिम चरणमा पुगेपछि दोस्रो चरणकालागि समेत बजेट छुट्याइएको संघीय शहरी भवन निर्माण कार्यालय धनुषाले जनाएको छ । त्यस्तै सोही ठेक्कामा जनकपुरधाम वडा नम्बर ९ स्थित रामजानकी मन्दिर, अग्निकुण्डमा हनुमान मन्दिर, चित्रगुप्त सेवा समितिको भवन र मणिमण्प नजिकैको पोखरीको सौन्दर्यीकरण समेत गरिनेछ ।
तपाईको प्रतिक्रिया !
