सौर्य खबर

२०८२ असार ३, मंगलवार १४:०८

काठमाडौं ।
रौतहट बमकाण्डका आरोपित मोहम्मद आफ्ताब आलमलाई प्रमाण हुँदाहुँदै सफाइ दिने न्यायाधीशहरूमाथि कारबाहीको माग गर्दै न्यायपरिषद्मा उजुरी परेको छ ।
बम विस्फोटमा ज्यान गुमाएका त्रिलोकप्रताप सिंह (पिन्टु)का पिता श्रीनारायण सिंह राजपुतले उच्च अदालत वीरगञ्जका न्यायाधीश डा. खुसीप्रसाद थारु र अर्जुन महर्जनविरुद्ध उजुरी दर्ता गराएका हुन् । उनले दुवै न्यायाधीशको कार्यक्षमता र न्यायिक आचरणप्रति प्रश्न उठाउँदै अनुशासनात्मक कारबाहीको माग गरेका छन् ।
२०६४ सालमा भएको सो बम विस्फोट घटनामा त्रिलोकप्रताप सिंहको मृत्यु भएको थियो । त्यसयता श्रीनारायण सिंह १८ वर्षदेखि दोषीलाई न्यायको कठघरामा ल्याउने संघर्षमा छन् । तर, उच्च अदालतले आलमसहितका आरोपितलाई प्रमाणको यथोचित मूल्यांकन नगरी सफाइ दिएको भन्दै उनी असन्तुष्ट छन् ।
न्याय नपाएको महसुस गरेका सिंह कानुन व्यवसायीहरूको सहयोगमा रौतहटबाट काठमाडौं आएर न्यायपरिषद्मा उजुरी दर्ता गराएका हुन् । उजुरीसँगै उनले निष्पक्ष न्याय सुनिश्चित गर्न न्यायाधीशहरूको भूमिकामाथि पुनरावलोकन आवश्यक रहेको बताएका छन् ।