सौर्य खबर

२०८२ जेष्ठ २२, बिहीबार ११:५९

जनकपुरधाम ।
आर्थिक अनुशासनसम्बन्धी छानबिन समिति गठनका लागि सत्तापक्ष तयार भएपछि मधेस प्रदेशसभाको गतिरोध अन्त्य भएको छ ।

चैत २७ गते नै छानबिन समिति गठन गर्ने विषयमा सत्तारुढ र विपक्षी दलबीच सहमति भए पनि प्रतिपक्षी दलहरूले आफ्नो तर्फबाट सदस्यको नाम पठाउँदा समेत सत्तापक्षले नाम नपठाएका कारण समिति गठन प्रक्रिया अघि बढ्न सकेको थिएन ।
यसबीच, बुधबार बसेको प्रदेशसभा बैठक विपक्षी दलहरूले समिति गठनको माग गर्दै अवरुद्ध गरेपछि सभामुख रामचन्द्र मण्डलले बैठक स्थगित गरेका थिए ।
तर, अब सत्तापक्षले पनि छानबिन समितिका लागि नाम पठाउने तयारी गरेपछि समिति गठनको बाटो खुलेको छ । त्यससँगै मधेस प्रदेशसभाको बैठक आज दिउँसो १ बजेका लागि बोलाइएको छ ।
प्रदेशसभामा लामो समयदेखि आर्थिक अनुशासन र पारदर्शितासम्बन्धी विषयमा बहस चल्दै आएको छ । विपक्षी दलहरूले सार्वजनिक खर्चमा अनियमितता भएको आरोप लगाउँदै छानबिन समिति गठनको माग गर्दै आएका थिए ।