२०८२ जेष्ठ १०, शनिबार १४:१२
काठमाडौँ ।
रुपन्देहीको सुप्रिम सहकारी ठगी मुद्दामा कारागारमा रहेका आफ्ना सभापति रवि लामिछानेलाई सर्वोच्च अदालतले पनि छाड्न नमिल्ने आदेश दिएपछि राष्ट्रिय स्वतन्त्र पार्टी (रास्वपा) ले आज एकै दिन सचिवालय र केन्द्रीय समितिका बैठक राख्ने भएको छ ।
रविले दिएको बन्दी प्रत्यक्षीकरण निवेदनमा सुनुवाइ गर्दै सर्वोच्चले शुक्रबार राति थुनामै राख्नुपर्ने उच्च अदालतकै आदेश सदर गरेलगत्तै आकस्मिक रूपमा बसेको रास्वपाको भर्चुअल सचिवालय बैठकले आज पुनः भर्चुअल रूपमै सचिवालय र केन्द्रीय समितिका बैठक राख्ने निर्णय गरेको हो ।
रास्वपाका अनुसार आज दिउँसो ३ बजे पार्टी सचिवालयको भर्चुअल बैठक र आजै अपराह्न ४ बजे केन्द्रीय समितिको भर्चुअल बैठक राखिने भएका हुन् ।
यसपछि जेठ ११ गते आइतबार दिउँसो २ बजे भने पार्टी कार्यालयमा केन्द्रीय समितिको बैठक बस्ने निर्णय गरिएको जानकारी रास्वपा सचिवालयले दिएको छ ।
सर्वोच्च अदालतले पूर्वगृहमन्त्री रवि लामिछानेलाई थुनामुक्त गर्न अस्वीकार गरेको हो। उनका व्यावसायिक साझेदार छविलाल बन्जाडेलाई पनि थुनामै राख्ने गरी मातहत अदालतको आदेश सर्वोच्चले सदर गरेको छ ।
तपाईको प्रतिक्रिया !
