सौर्य खबर

२०८२ जेष्ठ १, बिहीबार १३:३८

एजेन्सी ।
लखनउको मोहनलालगन्ज क्षेत्रमा रहेको किसान पथमा बिहारबाट दिल्ली जाँदै गरेको स्लिपर बसमा आगलागी हुँदा ५ जनाको मृत्यु भएको छ ।
लखनउ (दक्षिण) का डीसीपी निपुण अग्रवालले बसमा ७० जना सवार रहेको बताए । उनले भने, ’बसमा यात्रा गरिरहेका दुई बालबालिका र दुई महिलासहित पाँच जनाको आगलागीमा परेर मृत्यु भएको छ । अन्य यात्रुलाई उनीहरूको गन्तव्यमा पठाइँदै छ ।’
यद्यपि, आगलागी कसरी सुरु भयो भन्नेबारे अहिलेसम्म आधिकारिक जानकारी उपलब्ध छैन । प्रहरीका अनुसार बसको आपतकालीन गेट नखुल्दा पछाडि बसेका यात्रुहरू समयमै बाहिर निस्कन सकेनन् ।
समाचार एजेन्सी पीटीआईले जारी गरेको भिडिओमा बस पूर्ण रूपमा जलेको र यसको संरचना मात्र बाँकी रहेको देखिन्छ । उत्तर प्रदेशका मुख्यमन्त्री योगी आदित्यनाथले यस विषयमा अनुसन्धान गर्न अधिकारीहरूलाई निर्देशन दिएका छन् ।