सौर्य खबर

२०८२ बैशाख २३, मंगलवार १५:१४

जनकपुरधाम ।

मैथिलीका गायक रोशन मण्डलले आफ्नै काकाको छोराले आफूलाई घरबारविहिन बनाउने प्रपञ्च रचिरहेको आरोप लगाएका छन् । मिथिला विहारी नगरपालिका वडा नम्बर ३का गायक रोशनले काकाको छोरा रमेश मण्डलले घरबारविहिन बनाउन लागि परेको आरोप लगाए । रमेश मधेस प्रदेशको प्रदेशसभाका सभामुख रामचन्द्र मण्डलका ज्वाई हुन् ।

मिथिला बिहारी नगरपालिका–३ बस्ने सभामुख मण्डलका ज्वाई रमेश मण्डलमाथी गायक रोशन मण्डल र उनको श्रीमति मिलन देवी मण्डलले यस्तो आरोप लगाएका हुन् । रोशन मण्डल र उनका श्रीमति मिलनले जनकपुरधाम स्थित पत्रकार सम्मेलन गरी आफूहरुलाई घरबारविहीन बनाउन प्रताडित गर्ने गरिएको आरोप लगाए ।

मण्डल दम्पत्तीले भने‘दिनहुँ आफ्नो घरमा बियरको बोतल, माटो फ्याक्ने गरेका रमेशले आज दिशाको पोका बनाएर फ्याके यो अति भएपछि आज हामीहरु तपाईहरु समक्ष आएका छौं ।’

पटक–पटक यस्ता क्रियाकलाप भए पछि आफूहरुले प्रहरी चौकी तारापट्टि सिरसियामा निवेदन दिएपछि प्रहरीकै सामू आफूहरुमाथि हातपात भएको र प्रहरी समेत केही गर्न नसकेको मण्डल दम्पत्तीको आरोप छ । ससुरा सभामुख रहेका कारण प्रहरी प्रशासन समेत आफूहरुको गुनासो नसुनेको र आफ्नो ज्यानको खतरा रहेको उनीहरुले बताए ।

आफूहरुले मधेश प्रदेशका सभामुख रामचन्द्र मण्डललाई यस विषयमा पटक–पटक जानकारी गराउँदा पनि उनले त्यहाँबाट घरबार बेचेर अन्यत्र जान सुझाएको तर आफ्नो ज्वाईलाई सम्हालन नसकेको उनीहरुको आरोप छ । उनीहरुले भने–‘गाउँमा पार्टी पोलिसि भएपनि आफूहरुले रामचन्द्र मण्डललाई सहयोग गरेको तर, आज हामीहरुलाई गाउँ छोड्न उनले पनि दवाव दिएका छन् ।’