२०८२ बैशाख २१, आईतवार ११:१५
काठमाडौँ ।
एक महिनादेखि आन्दोलनरत आवासीय चिकित्सकले आफूहरुको आन्दोलन जारी रहेको बताएका छन् ।
केही दिनदेखि आन्दोलनमा आएको चिकित्सक संघ शनिबार सरकारसँग सहमतिपछि काममा फर्किए पनि उनीहरुको आन्दोलनमा ऐक्यबद्धता जनाएका आवासीय चिकित्सकले उक्त सहमतिप्रति असन्तुष्टि जनाउँदै आन्दोलन जारी रहेको बताएका हुन् ।
स्वास्थ्यकर्मीका लागि सुरक्षित कार्यस्थल संघर्ष समितिले आफूहरुसँग कुनै पनि सहमति नभएको जानकारी गराउँदै आन्दोलन यथावत रहेको बताएको छ । ’चिकित्सा शिक्षा आयोगको मिति २०८१/१०/२५ गतेको सोह्रौँ पूर्ण बैठकले निर्णय गरेबमोजिमको पारिश्रमिक करिब ३ महिनादेखि नपाएको र पटक पटक निर्देशन दिने बाहेक कार्यान्वयनको कुनै ठोस कदम नचालिएको अवस्थामा हामी हाम्रा आन्दोलनका कार्यक्रमहरु सुचारु राख्न बाध्य छौं,’ शनिबार राति विज्ञप्ति जारी गर्दै समितिले भनेको छ, ’तीन महिनादेखि पारिश्रमिक नपाएका आवासीय चिकित्सकहरुलाई पारिश्रमिक दिलाउनको सट्टा ’निर्देशन दिने’, सहमति गर्ने जस्ता निर्लज्ज कृयाकलापहरुप्रती हामी गम्भीर आपत्ति प्रकट गर्दछौं ।’
स्वास्थ्यकर्मीका लागि सुरक्षित कार्यस्थल संघर्ष समितिको आह्वानमा नेपालका विभिन्न मेडिकल कलेजमा अध्ययनरत आवासीय तथा अन्य चिकित्सकहरु आफ्नो हकहितका लागि विगत ३२ दिनदेखि आन्दोलनरत रहेको समितिका प्रवक्ता डा. संजय बरालले बताएका छन् ।
तपाईको प्रतिक्रिया !
