सौर्य खबर

२०८० चैत्र २९, बिहीबार ०९:२६

काठमाडौँ । प्रतिनिधि सभा सुरु भएको झण्डै डेढ वर्षमा जम्मा २ वटा विधेयकले मात्र कानुन बन्ने अवसर पाए । संसदबाट पारित अर्को एउटा विधेयक प्रमाणीकरणका लागि राष्ट्रपति कार्यालयमा पुगेको छ ।हालसम्म सङ्घीय संसदबाट मिटरब्याजी विरुद्धको ऐन र अनुगमन तथा मूल्याङ्कन सम्बन्धी ऐन पारित भएका छन् । यस्तै सम्पत्ति शुद्धीकरण सम्बन्धी विधेयक पारित भएर राष्ट्रपति कार्यालय पुगे पनि प्रमाणीकरण भइसकेको छैन । गत असारमा पारित बजेट सम्बन्धी ३ विधेयकलाई पनि जोड्ने हो भने यो संसदबाट ५ विधेयक पास भए । यद्यपि पारित भएका आर्थिक विधेयकको प्रभाव आगामी असार मसान्तसम्म मात्र कायम रहन्छ ।कानुन निर्माणको थलो, जनताका आवाज उठाउने, कार्यपालिका र न्यायपालिका, संवैधानिक अङ्गका नेतृत्व चयनका गर्ने निर्णायक थलोको रुपमा रहेको सङ्घीय संसद कानुन निर्माण प्रक्रियामा भने निकै सुस्त रह्यो । गठबन्धन परिवर्तन, सरकार फेरबदल र विपक्षी दलको अवरोधको असर स्वरुप कानुन निर्माणको कामले गति लिन सकेन ।

सङ्घीय संसदको विधेयक शाखाका प्रमुख उपसचिव नारायण ढकालका अनुसार संसदको यो अधिवेशनका लागि २८ वटा विधेयक छन् । जसमध्ये २३ वटा विधेयक प्रतिनिधि सभामा छन् । प्रतिनिधि सभामा रहेका यी विधेयकमध्ये १४ वटा विधेयक संसदीय समितिमा छलफलका क्रममा छन् ।

२ वटा विधेयक मात्र प्रमाणीकरण भए भने दर्ता भएका २ सन्धिमध्ये एउटा अनुमोदन भइसकेको छ । अर्को सन्धि अनुमोदन हुन बाँकी छ । यस्तै प्रतिनिधि सभाबाट पारित भएर २ विधेयक राष्ट्रिय सभामा गएका छन् ।