२०७८ मंसिर २७, सोमबार १७:४८

काठमाडौं । भोलि बस्ने प्रतिनिधि सभाको बैठकमा ६ वटा अध्यायदेश पेश हुने भएको छ । सङ्घीय संसदको महासचिव डाक्टर भरतराज गौतमले आज कार्यसूची सार्वजनिक गर्दै भोलि ६ वटा अध्यादेश पेश गर्ने कार्यसूची रहेको जानकारी दिए । गृहमन्त्री बालकृष्ण खाँडले नेपाल प्रहरी र प्रदेश प्रहरी पहिलो संशोधन अध्यादेश, २०७८, तेजाव र अन्य घातक रासायनिक पदार्थ (नियमन) अध्यादेश र सामाजिक सुरक्षा (पहिलो संशोधन) अध्यादेश २०७८ पेश गर्ने कार्यसूची छ ।

यस्तै भौतिक पूर्वाधार तथा संसदीय मामिला मन्त्री रेनुकुमारी यादवले रेल्वे अध्यादेश पेश गर्ने छिन । यसैगरी कानून, न्याय तथा संसदीय मामिला मन्त्री दिलेन्द्र प्रसाद बडूले यौन हिंसा विरुद्धका केही ऐनलाई संशोधन गर्ने अध्यादेश २०७८ र फौजदारी कसूर तथा फौजदारी कार्यविधि सम्बन्धी केही ऐन संशोधन गर्ने अध्यादेश पेश गर्ने कार्यसूची रहेको सङ्घीय संसद् सचिवालयले जनाएको छ । यी अध्यादेश पेश गर्नुअघि राष्ट्रपतिबाट प्राप्त अधिवेशन आह्वान सम्बन्धी पत्र पढेर सुनाउनुहुनेछ ।