२०७८ मंसिर २७, सोमबार १५:१८

काठमाडौं । काठमाडौं उपत्यका लगायत देशभर चिसो बढ्ने क्रम जारी छ । देशभर चिसो बढ्ने क्रममा रहेकोले चिसोबाट बच्न आवश्यक सुरक्षा एवं सतर्कता अपनाउन मौसमविद्हरूले आग्रह गरेका छन् ।

गत शुक्रबारदेखि उपत्यकाको तापक्रम दैनिक एकदेखि दुई डिग्री सेल्सियसले घटिरहेको जल तथा मौसम विज्ञान विभागले जनाएको छ । तापक्रम घटेर चिसो बढ्नु कुनै प्रणालीको प्रभाव नभई मौसमी कारण भएको विभागले जानकारी दिएको छ ।

आज काठमाडौँ उपत्यकाको तापक्रम यो वर्षकै कम चार दशमलव तीन डिग्री सेल्सियसमा झरेको छ । आइतबार उपत्यकाको तापक्रम पाँच दशमलव शून्य डिग्री सेल्सियस थियो । अझै उपत्यकाको तापक्रम घटेर शून्य डिग्रीसम्म पुग्ने मौसमविद्को अनुमान छ ।

चिसो मौसममा खानपान र लगाउने कुरामा विशेष ध्यान पुराउँन जरुरी छ । साथै चिसोबाट बालबालिका र बृद्धाहरु धेरै प्रभावित हुने हुँदा उनीहरुको ख्याल गर्न पनि स्वास्थ्यकर्मीहरुले सुझाएका छन् ।